Un ano de traballo da Xunta de Goberno da AFG
|
Neste camiño andivemos na procura dunha maior colaboración cos diferentes protagonistas do sector ou cadea forestal, tanto na actividade silvícola como na da industria transformadora dos seus produtos; ainda que non sempre foi feliz o noso achegamento, consideramos que esta colaboración dará a curto prazo unha maior consistencia ao sector e con ela unha maior viabilidade ás melloras que vimos propoñendo; soamente traballando xuntos conqueriremos fortalecer un dos principais alicerces da economia galega, como é o sector forestal.
Preocupados pola situación fiscal viaxamos a comezos de 2005 a Madrid ao Ministerio de Facenda, onde presentamos as nosas demandas ao Director Xeral de Tributos a quen conseguimos interesar na temática forestal coas súas peculiaridades; ao mesmo tempo logramos traer representantes deste Ministerio a debater en Vigo estes asuntos nas Xornadas Internacionais de Fiscalidade e Financiación de Montes. Esperamos aínda a súa resposta oficial ás nosas demandas.
No pasado verán produciuse o cambio de Goberno da Xunta de Galicia ao mesmo tempo que o monte ardía por todas partes; a nosa primeira misión foi ofertar axuda e apoio aos novos gobernantes coa vontade de remar todos na mesma dirección; con esta intención visitamos aos novos conselleiros do Medio Rural e de Industria e Innovación completando as áreas nas que a nosa actividade ten unha maior incidencia. Un documento coas nosas ideas sobre política forestal foi presentado a estes conselleiros que o recibiron de bo agrado.
|
