A resinación e as súas posibilidades de encaixe nos piñeirais de Galicia
Enrique Martínez Chamorro
Doutor enxeñeiro de Montes Centro de Investigación Forestal de Lourizán Consellería do Medio Rural
|
As posibilidades de resinación do piñeiro do
pais ( Pinus pinaster Ait.) en Galicia, xa foron
obxecto de estudo a través de diferentes ensaios
durante as décadas dos 50, 60 e 70, aínda que moitos
forestais descoñezan estes traballos.
Hoxe estamos a vivir unha conxuntura internacional
que fai posible e viable que a resinación en
Galicia sexa un aproveitamento compatible coa
produción de madeira ou biomasa, sempre e cando
se cree un sector e se atopen os métodos e sistemas
de resinación que se adapten mellor ás peculiaridades
do medio forestal galego.
A situación actual da resina a escala mundial. A
produción mundial de resina oscila na actualidade
entre 800.000 e un millón de toneladas por ano.
China fíxose co mercado mundial a partir dos anos 80,
acaparando o 80% da produción, ata que no 2010 se
produciu unha grave crise de abastecemento no mercado
global, motivada pola propia China que baixou
o ritmo das súas exportacións, debido fundamentalmente
á caída da produción nacional, motivada pola
perda de man de obra no campo, ó incremento dos
custos salariais, e ás malas prácticas e planificacións
dos seus aproveitamentos resineiros que sobre explotaron,
en moitos casos, o seu patrimonio forestal.
Tendo en conta o anterior, que Europa é, cun
30%, o primeiro consumidor mundial da produción
e que as resinas naturais son cada vez máis demandadas
como substitutivo dos derivados do petróleo
para a fabricación de multitude de produtos
(dende os fixadores de aromas ata as pinturas de
sinalización das estradas), fainos pensar que a crise
da resina a nivel mundial non é só conxuntural e
que a demanda e os prezos van seguir en aumento. |
