XXVIII Asemblea Xeral da Asociación Forestal de Galicia.
O Rosal, 17 de maio de 2014
|
A Asociación Forestal de Galicia
celebrou o sábado 17 de maio no Auditorio Municipal
de O Rosal a súa XXVIII Asemblea Xeral
anual, á que acudiron propietarios de montes e
representantes de comunidades de montes veciñais
en man común de toda Galicia. O acto de
apertura foi presidido polo alcalde do Rosal, Jesús
Fernández Portela.
Ademais de aprobar o informe económico e o
informe de actividades do ano 2013, a asemblea
analizou en profundidade varios temas de gran
calado na silvicultura galega actual: a política de
control dos incendios forestais, as normativas que
están a provocar graves distorsións e problemas na
actividade forestal, o mercado da madeira e o desenvolvemento
da biomasa con fins térmicos.
A situación dos incendios forestais. Presentouse o
Informe sobre a situación dos incendios forestais que
acaba de editar a AFG e no que se fai o diagnóstico
do problema desde a perspectiva dos propietarios
forestais galegos. Os silvicultores galegos queren
iniciar un debate aberto para elaborar unha política
compartida polos principais axentes do sector e as
institucións involucradas e apoiada pola sociedade
galega. No informe formúlanse propostas de mellora
encamiñadas a diminuír o risco de incendios
forestais e a facer máis eficientes os recursos dedicados
ao control dos incendios forestais. |
