A certificación forestal
Daniel Rodríguez Cebreiro
Secretario técnico XFS Selga
|
A certificación en Galicia estase a impoñer
de xeito definitivo. O mercado require que a
madeira que saia ao mesmo vaia con tódalas garantías
necesarias que aseguren que proceden de montes
xestionados de xeito sostible. Os dous certificados
máis importantes do mundo (PEFC e FSC) están
avanzando de xeito constante no monte galego. O
segundo con certo retraso debido a que ata hai pouco
era practicamente inviable certificar baixo ese estándar
por resultar demasiado caro. Esa madeira certificada
é recoñecida no mercado e, polo tanto, dá
garantías ao consumidor final (aquel que merca o
papel, o moble, o cartón...) de que esas cortas non
producen deforestación e non teñen unha repercusión
negativa no entorno senón que todo o contrario,
contribúen a dar valor ao noso entorno rural. Pero ata
chegar ao momento actual, o camiño foi longo.
Unha aposta dende o primeiro momento. Entre
os anos 2002 e 2003 a Asociación Forestal de Galicia
agrupa a expertos de diferentes áreas para elaborar
un diagnóstico do monte galego segundo os
criterios de xestión forestal sostible. Este diagnóstico
(publicado posteriormente) pretendía ser unha
guía para a entrada definitiva dos sistemas de certificación
forestal en Galicia xa que o retraso na
implantación de ditos sistemas provocaba que a
madeira galega non puidese competir en igualdade
de condicións con outras madeiras de terceiros
países con traxectorias máis avanzadas nos procesos
de certificación. |
