A crise no sector forestal e a industria da madeira
Francisco J. Fernández de Ana Magán
Presidente AFG
|
En tempo de crise económica políticos e industriais peléxanse por atopar un culpable da situación
e manterse eles liberados de pecado; neste sentido estamos escoitando a cotío nos medios de comunicación
a opinión das industrias madeireiras galegas, a traveso dos seus voceiros, que consideran que o problema
de fondo é o alto prezo da madeira galega polo noso minifundio.
É unha verdade de caixón que para producir madeira con menores custos é preciso ter grandes extensións
onde se mecanice o traballo e o volume total da venda tape o rendemento unitario; pero esa mesma razón
xa non é tan certa para producir madeiras de alto valor con moi boa calidade, madeiras que representan
unha renda para os propietarios e, ás veces un maior valor engadido para o país. Unha hectárea desta
madeira pode chegar nas nosas boas condicións a producir entre 300 e 400 m3 en quendas de 40 anos e
cun valor final que pode superar os 60.000 € en pé o que permite manter ao silvicultor unha cativa renda
bruta de 1.500 € por hectárea e ano; este sistema de produción dá traballo a moita xente na aplicación
dunha silvicultura de calidade e na plusvalía que aporta na súa transformación. |
