Presentación dos resultados do proxecto FORSEE en Galicia
|
O proxecto FORSEE chega ao seu fin e o día 23 de abril tivo lugar na Escola Politécnica Superior de Lugo a presentación dos resultados en Galicia.
O obxectivo do proxecto era avaliar os criterios e indicadores da xestión forestal sostible e adaptalos á realidade dos montes galegos. No proxecto participaron socios de Irlanda, Francia (Aquitania e Midi Pyrénées), Portugal (Centro e Norte) e España (Cataluña, País Vasco, Navarra, Castilla-León, Cantabria e Galicia).
A apertura da Xornada na que se presentaron os resultados correu a cargo do director da Escola Politécnica Javier Bueno Lema, dando paso de seguido á presentación por parte de varios profesores dos resultados dos criterios e indicadores de xestión forestal sostible avaliados dentro do proxecto: fixación de carbono, sanidade forestal, produción forestal, biodiversidade, protección de solos e aspectos socioeconómicos.
No acto tamén participou o xerente da Unión de Silvicutores do Sur de Europa, Óscar Barreiro Mouriz e mais o director do Instituto Europeo do Bosque Cultivado, Chistophe Orazio, esta última institución foi a coordinadora do proxecto.
|
